प्रेमनारायण आचार्य/उज्यालो
अर्घाखाँची, भदौ ५ – झट्ट हेर्दा गाईंभैंसी बाँध्ने छाप्रो जस्तो छ । माथि टिनले छाएको छ । वरिपरि खुल्ला ।
त्यसैमा बसेर विद्यार्थीहरु पढिरहेका छन् । पढ्दा पढ्दै पानी पर्यो भने उनीहरु झोला लिएर नजिकै रहेको अर्को कक्षामा ओत लाग्न पुग्छन् । पानी थामिएपछि फेरि अछाप्रोमै फर्कन्छन् ।
यस्तो दुःख र हैरानी ब्योहोरिरहेका छन् ठाडा गाविसमा रहेको गौरा माविका विद्यार्थीहरुले । सरकारले शिक्षामा करोडौं रकम लगानी गरिरहेको भए पनि यहाँका बिद्यार्थी भने गाईभैंसी बाँध्ने जस्तो छाप्रोमा बसेर पढ्न बाध्य छन् । उनीहरुलाई पढिरहेको समयमा पानी नपरे हुन्थ्यो भन्ने चिन्ता हुन्छ । विद्यालयमा भवन अपुग भएकाले छाप्रोमा पढाउनुपरेको प्रधानाध्यापक चोपलाल पौडेलले बताउनुभयो । अरु कक्षाका बिद्यार्थीहरु राम्रो कक्षामा बसेर पढेपनि कक्षा ९ का विद्यार्थीहरु भने बर्षौंदेखि छाप्रोमा पढ्दै आएका छन् । ‘पानी आयो भने कक्षा ९ र १० का बिद्यार्थीलाई एउटै कोठामा राखिन्छ, पढाउन सकिदैन’ प्रधानाध्यापक पौडेलले बताउनुभयो ।
लामो समयदेखि भवन अभावमा छाप्रोमा पढ्दै आएपनि विद्यालयको भवन निर्माणमा कसैले पहल नगरेको विद्यार्थीहरु गुनासो गर्छन् । २०६८ सालमा भवन बनाउन शुरु गरेपनि रकम अभावको कारण अहिले अलपत्र छ । आर्थिक बर्ष २०६८/०६९ मा जिल्ला प्राविधिक कार्यालयको शान्तिका लागि विकास कार्यक्रमबाट आएको सात लाख र स्थानीय सामुदायिक वनको लागानीमा भवन निर्माण शुरु गरेपनि भुइँतल्लामा पिल्लर राख्दैमा बजेट सकिएको तर थप रकम प्राप्त ननभएकाले काम रोकिएको प्रधानाध्यापक पौडेलले बताउनुभयो ।
भवन निर्माणका लागि जिल्ला विकास समिति, शिक्षा कार्यलय र सभासद र नेता सबैलाई अग्रह गरिरहेको भएपनि बजेट आउन नसक्दा भवन निर्माणको काम रोकिएको अभिभावकहरु बताउँछन् । बर्षौदेखि विद्यार्थीहरु छाप्रोमा बसेर पढिरहदा पनि भवन बनाउने काममा जिल्ला शिक्षा कार्यालय तथा अन्य विकासे कार्यलयको ध्यान नपुग्दा अभिभावकहरु चिन्तित बनेका छन् । Src : http://ujyaaloonline.com/
0 comments:
Post a Comment